Asset Publisher Asset Publisher

Return to Full Page
Back

የባዮ-ቴክኖሎጂ ኢንስቲትዩት የጥናትና ምርምር ባለሙያዎች ቡድን በጣና ሐይቅ ላይ የተከሰተውን የእምቦጭ አረም ሁኔታ ለማጥናት ወደ ባሕርዳር አቀና

በጣና ሐይቅ ላይ የተከሰተውን የእምቦጭ አረም ሁኔታ ለማጥናት የባዮ-ቴክኖሎጂ ኢንስቲትዩት የጥናትና ምርምር ባለሙያዎች ቡድን ወደ ባሕርዳር አቀና።በኢንስቲትዩቱ ጥናትና ምርምር ላይ የሚሰሩ ስድስት ምሁራን ናቸው ዛሬ ወደ ስፍራው ያቀኑት።ምሁራኑ በውኃ ጥበቃ፣ በኢንዱስትሪ፣ በአካባቢ ጥበቃና በተለያዩ የሙያ መስኮች ጥናትና ምርምር ያደረጉ መሆናቸው ታውቋል።በሚኖራቸው የአንድ ሳምንት ቆይታ የጣና ሐይቅ ያለበትን ሁኔታ ተዘዋውረው የሚጎበኙ ሲሆን፤ ጉዳዩን በቅርበት ከሚከታተለው የባሕርዳር ዩኒቨርሲቲ አመራሮች ጋር ተገናኝተው ይመክራሉ።የምሁራኑ ቡድን የጣና ሐይቅን ከአረም በመከላከል ተሳትፎ እያደረጉ ያሉ ግለሰቦችና የአካባቢውን ማሕበረሰብ በማነጋገር ለቀጣይ የጥናትና ምርምር መነሻ የሚሆን ሰነድ ይዞ ይመለሳል ተብሏል።ምሁራኑ ጣናን ከወረረው እምቦጭ አረም ለመከላከል እስካሁን የተሰሩ ስራዎችን ጥንካሬና ድክመት በመገምገም ቀጣይ ምርምርና ጥናት እንደሚሰሩ የኢንስቲትዩቱ የሕዝብና ዓለም አቀፍ ግንኙነት ዳይሬክተር አቶ ወንድም ተክሉ ለኢዜአ ገልጸዋል።የአካባቢው ማሕበረሰብ በተለይም አርሶ አደሩ አረሙን በእጁ በመንቀል እየታገለ ቢቆይም ከማሕበረሰቡ ጥረት በላይ የእንቦጭ መስፋፋት በመፍጠኑ ጣናን መታደግ አልተቻለም።ባለፈው ዓመትም የተለያዩ ግለሰቦችና ድርጅቶች አረሙን በማጨድ ማስወገድ የሚያስችል ማሽን እየገዙ ማስረከባቸው ይታወቃል።ይሁን አንጂ አረሙን ማስወገድ ባለመቻሉ የሐይቁን ሕልውና ለማስቀጠል በጥናትና ምርምር የታገዘ ዘመናዊ አሰራር አስፈላጊ ሆኖ ተገኝቷል።ኢንስቲትዩቱ በጣና ሐይቅ ላይ በተጋረጠው እምቦጭ አረም ላይ ጥናትና ምርምር ሳያካሂድ መቆየቱን ተናግረዋል።በቀጣይ ከተቋሙ ውጭ ጥናትና ምርምር ለሚያደርጉ ግለሰቦችም ድጋፍ እንደሚያደርግ ነው ያብራሩት።የጣና ሐይቅ አሁን ያለበት ችግር ካልተፈታ በቀጣይ በታላቁ ሕዳሴ ግድብ ላይም ተጽእኖ እንደሚኖረው ምሁራን ይናገራሉ።በአሁኑ ወቅት ከጣና ሐይቅ 50 ሺህ ሔክታር ያህሉ በእምቦጭ አረም እንደተወረረ መረጃዎች ያሳያሉ።አረሙ መታየት የጀመረው በ2005 ዓ.ም ሲሆን በአንድ ዓመት 20 ሺህ ሔክታር ስፋት መሸፈን በሚያስችለው ፍጥነት እየተዛመተ ነው።

ጥር 14/2010 /ኢዜአ/